0 
0 
વડોદરા: શહેરમાં સાયબર ઠગાઈનો વધુ એક ચોંકાવનારો કિસ્સો સામે આવ્યો છે. આઈટી વિભાગના અધિકારી તરીકે ઓળખ આપી એક યુવકને તેની વીમા પોલિસી સામે રૂ. 20 લાખની લોન અપાવવાની લાલચ આપવામાં આવી હોવાનો ગંભીર આરોપ સામે આવ્યો છે. લોન મંજૂર કરાવવા માટે અલગ-અલગ ફી, ચાર્જિસ અને અન્ય પ્રક્રિયાના બહાના હેઠળ યુવક પાસેથી લાખો રૂપિયા વસૂલવામાં આવ્યા હોવાનું ફરિયાદમાં જણાવાયું છે.પ્રાપ્ત વિગતો અનુસાર, આરોપીઓએ યુવકનો વિશ્વાસ જીતવા માટે પોતાને અધિકારી તરીકે રજૂ કર્યા હતા. ત્યારબાદ યુવકને વીમા પોલિસી સામે સરળતાથી રૂ. 20 લાખની લોન મળી જશે તેવી લાલચ આપવામાં આવી હતી. શરૂઆતમાં લોન પ્રક્રિયા આગળ વધારવા માટે વિવિધ પ્રકારના ચાર્જિસ ભરવાના હોવાનું કહી રકમ માંગવામાં આવી હતી.ફરિયાદ મુજબ, લોન અપાવવાના નામે યુવક પાસેથી તબક્કાવાર અલગ-અલગ રકમ લેવામાં આવી હતી. લોન પ્રોસેસિંગ ફી, અન્ય ચાર્જિસ અને વિવિધ બહાનાઓ હેઠળ રકમ ભરાવવામાં આવતા કુલ અંદાજે રૂ. 11.23 લાખથી વધુની રકમ યુવક પાસેથી લેવામાં આવી હોવાનું સામે આવ્યું છે.યુવકે મોટી રકમ ચૂકવ્યા બાદ પણ તેને વચન મુજબની રૂ. 20 લાખની લોન મળી નહોતી. એટલું જ નહીં, લોન માટે વધુ રકમની માંગણી કરવામાં આવતા યુવકને પોતાની સાથે છેતરપિંડી થઈ હોવાની શંકા ગઈ હતી. ત્યારબાદ સમગ્ર ઘટનાક્રમની તપાસ કરતા યુવકે સાયબર ક્રાઇમ પોલીસનો સંપર્ક કર્યો હતો.ફરિયાદ નોંધાયા બાદ પોલીસે સમગ્ર મામલે તપાસ શરૂ કરી છે. આરોપીઓએ કયા નંબર અને કયા માધ્યમથી યુવકનો સંપર્ક કર્યો, પોતાની ઓળખ કેવી રીતે છુપાવી અને યુવક પાસેથી લેવામાં આવેલી રકમ ક્યાં ટ્રાન્સફર થઈ તે સહિતના મુદ્દાઓની તપાસ કરવામાં આવી રહી છે.ફરિયાદના આધારે તપાસ તેજમામલામાં યુવક દ્વારા સાયબર ક્રાઇમ સંબંધિત હેલ્પલાઇન અને પોલીસ તંત્રનો સંપર્ક કરવામાં આવ્યો હોવાનું પણ સામે આવ્યું છે. પોલીસ હવે બેંક ટ્રાન્ઝેક્શન, મોબાઇલ નંબર, ડિજિટલ વ્યવહારો અને આરોપીઓની ઓળખ સહિતની વિગતો મેળવી સમગ્ર છેતરપિંડીના નેટવર્ક સુધી પહોંચવાના પ્રયાસો કરી રહી છે.રૂ. 20 લાખની લોનનું સપનું બતાવી રૂ. 11 લાખથી વધુ રકમ ખંખેરી લેવાઈ હોવાના આક્ષેપે વડોદરામાં સાયબર ઠગાઈનો આ મામલો ફરી એકવાર ચેતવણીરૂપ બન્યો છે.